صباح الدین علی، ترک ناول نگار، افسانہ نگار، شاعر اور صحافی تھے۔ ان کا زیر نظر ناول”کم سخن یوسف“ Kuyucakli Yusufکا اردو ترجمہ ہے جو 1937ءمیں شائع ہوا۔اس کا شمار ترک ادب کے مقبول ترین ناولوں میں ہوتا ہے۔اس پر مبنی فلم بھی ترکی کے نیشنل ٹیلی ویژن پر پیش کی گئی تھی۔ ناول کا موضوع ترکی کے قصباتی علاقوں میں اعلیٰ بااثر افراد کی طرف سے کمزوروں پر روا رکھے جانے والے مظالم اور مصائب ہیں۔نوسالہ یوسف اپنے والدین کو اپنی نگاہوں کے سامنے قتل ہوتے دیکھتا ہے۔ بعد ازاں میئر صلاح الدین بے، یوسف کی پرورش کی ذمہ داری اٹھا لیتے ہیں۔ عمر کی تفاوت کے باعث صلاح الدین بے اور ان کی بیوی شاہندے کے تعلقات کشیدہ رہتے ہیں جو ان کی بیٹی معزز اور یوسف کے درمیان پروان چڑھتی محبت پر مزید بگاڑ کا شکار ہو جاتے ہیں۔ کم سخن یوسف کو ترک ادب سب سے رومان پسند کردار گردانا جاتا ہے۔ زندگی کی سفاکی، حالات کی بے رحمی سے خاموشی سے نمٹتا اور ایک المیہ انجام کی طرف بڑھتا کردار۔ شاعرانہ محبت کی کہانی کا یہ ہیرو ترک ادب میں اپنا ایک منفرد مقام رکھتا ہے۔ اپنے اس ناول میں صباح الدین علی نے دیہی قصباتی زندگی کی بھی شان دار منظرکشی کی ہے۔