فرخ سھیل گوئندی  وتی جُھد، نبشتاک ءُ کتابانی ردا  پاکستان ءِ سیاسی، لبزانکی، وانگ ءُ زانگی ءُ مھلوکءِ نیامءَ یک  جتائیں پجارءِ داریت۔  اے کتاب  آئیءِ سپرءَ ھال  " میں ہوں جھان گرد" ءِ  بلگاریہءِ بَھرءِ رجانک انت کہ    آئیءَ 1983 ءَ  سوشلسٹ بلگاریہ ءِ   سیل ءُ سواد ءِ پد  نبشت کُتگ انت۔

فرخ سھیل گوئندی پاکستان ءِ نامداریں نبشتکار ءُ جُھد کار انت کہ وتی   کَلم ءُ جُھد ءَ گوں پاکستانءرا گھبودی ریاست جوڑ کنگءَ دزگٹءَ انت۔ گوستگیں بازیں سالاں  چہ وتی نبشتاک ءُ جُھدءَ گوں   پاکستانی چاگردءَ را  جمھوری ءُ بنی آدم ءِ بستاری رھبند ءِ ردا جوڑ کنگءِ   کوششت کنگءَ  انت۔وتی رژن ھیالی ءُ  مھلوکءَ گوں ھمگرنچیں ھیال ءُ لیکہ سوبءَ  وتی جتائیں پجارءِ داریت۔ فرخ سھیل گوئندی  پاکستان ءِ سیاسی   چاگردءِ نامداریں  مردم زانگ بیت کہ آئیءَ  کدی ھم  وتی ھیال ءُ لیکہ ءُ مھلوک ءَ گوں ھمگرنچیءَرا   نزور  کنگءَ سئوداگری نہ کُتگ۔

فرخ سھیل گوئندیءَ پانزدھءَ چہ گیش  کتاب ءُ سدانی کساس ءَ نبشتانک نبشت کُتگ انت۔ آئیءَ سیاست، راجدپتر، چاگرد،  میاں استمانی  جاورھالانی ھوری بازیں سرھالانی سرءَ      نبشت کُتگ۔ آئی ءَ پاکستان، زرباری ایشیا ءُ نیامجینی ایشیا ءِ  سیاسی، راجیءُ  دمگی سرھال ھاسیں وڑءَ ترکی، جمھوریت  ءُ امریکہ ءِ میان استمانی کردءَ  را ھاسیں دلگوشی دیانءَ نبشت کُتگ۔ گوستگیں پانز دھ سال ءَ چہ   نوک زمانگیں اھوالکاری پڑ بزاں الیکٹرانکءُ ڈجیٹل  میڈیا ءَ گوں ھم ھمگرنچ  انت۔  آ وتی چارءُ تپاس ءِ ردا  وتی نبشتاکاں دیما کاریت۔ 48 ڈیھانی جھان گردیءَ  آئی ءِ سنچ ءُ لائقیءَرا گُشادی بخشاتگ۔ آھی ءَ مزنیں کساس ءَ دمگی، راجی ءُ میان استمانی   مراگشانی تَھا بَھر زُرتگ۔ تُرکی   آئی ءِ ارزشت داریں سرھال انت۔ ترکیءَ راجدپتر، دودءُ ربیدگ، دودمان ءُ سیاست  باروا  آئیءِ سدانی کساس ءَ  نبشت چھاپ ءُ انگ شنگ بوتگ انت۔  وتی جُھدءَ را  نوکیں دروشم دیگءِ ھاترا   "جمھوری پبلیکیشنز"  نام ءَ  یک شنگکاری ادارگ  جوڑ کُتگ کہ  آئی ءِ  ردا  پاکستان ءُ  تیوگیں جھانے  نبشتکارانی کتاب  چھاپ ءُ شنگ کنگءَانت۔  فرخ سھیل گوئندیءِ   پاکستان پیپلز پارٹی ءِ  گوں دارج مدتیں  نزیکیں تعلقءِ  بوتگ بلے گوستگیں دھکءَ چہ پاکستان ءَ دیمرئی  پسندیں ھیال ءُ لیکہ ءَ را  ردوم دیگءَ دلگوش کنانءَ  پٹ ءُ پول، نبشتانک ءُ چھاپ ءُ شنگ ءِ نیمگا دلگوش گور کُتگ ۔   نبشانک، گُشتانک ءُ چھاپ ءُ شنگ ءِ پڑءَ وتی جتائیں پجارءِ داریت۔ آئی ءَ وتی نبشتانک،  جُھدءُ  شنگکاری ءِ  کوششتاں گوں یک   نوک دروشمیں  لبزانکی جُھد "Intellectual Activism"  چاگردءِ جوڑ کُتگ۔